رهافة الكلمة ورقة الاحساس وشاعرية ملهمة

كتب . الاستاذ الدكتور عبد العظيم أكول

  من نافلة القول ان هناك ندرة ماثلة في مجال الاصوات الشعرية الغنائية في بلادنا وقد عمل اتحاد شعراء الاغنية السودانية منذ تأسيسه علي ضم الشاعرات المتميزات في الساحة الفنية فبرزت اصوات شعرية نسائية غاية في الابداع نذكر منهن امنة خيري عليها رحمة الله وحكمت يسن عليها رحمة الله وهناك ايضا سمرقندية المحتسب الي عصرنا هذا وظهور عدد من الاصوات الشعرية النسائية في الساحة الفنية منهن سعدية عبد السلام ونضال الحاج و سعادة عبد الرحمن وقبلهن كانت الراحلة ليلي المغربي ايضا..وجاءت شاعرتنا المتميزة سهام الياس وهي شاعرة رقيقة الاحاسيس تكتب الشعر الغنائي الباهر الذي يؤكد علي عظم موهبتها الشعرية وهي تسير علي ذات الدرب وتثري الساحة الفنية باشعارها الزاهية وتعرفها الساحة الفنية عبر اشعارها التي وجدت الاحتفاء من قبل كبار شعراء الاغنية السودانية وذلك يشير الي انها شاعرة تخاطب الوجدان وتشكل اضافة جديدة للعنصر النسائي في مجال الاغنية السودانية الرصينة التي تشكل الرأي العام وترتقي بالذوق العام..لذلك نحن اليوم في سباحة شعرية مع الشاعرة المرهفة سهام يوسف..

تقول الشاعرة سهام في قصيدتها بعنوان وريني بس فهمك شنو..

وريني بس فهمك شنو

لزولة حفظت ودادك صانتو

وحتي الكلام الفي عينيك

قبال تقولو بتفهمو

وحفظت كمان منهج هواك

لي درجة انو تدرسو

مابتلقي غيري حبيبة ليك

تفرح قليبك تسعدو

والنجوم لو نطقو يوم

كان بالسهاد لي يشهدو

وريني بس فهمك شنو

ثم تدلف بنا الي قصيدتها. .التي تمتليء رقة وحنين وعاطفة جياشة..

فارد جناح الشوق

سائل عليك ضليت

كملت شعاع النور

فتشت ما خليت

هطلت علي احزان

خليتني تهت مشيت

غيرك بضيع دربي

لكني ما اتخليت

عنك سمير الروح

في الدنيا ما اتشكيت

ثم نبحر معها في قصيدة اخري حيث تقول..

شوقك فريد من نوع ندر

ماعندي قول

شوقك يحير ياقمر

سكت الكلام

ووقفت علي بعد النظر

شوقك دا معدوم المثيل

عاطفة ملايكة ولابشر

شوقك صحيح ماامنيات

هو حقيقي واقع منتظر

ثم تكتب الشاعرة سهام يوسف بنبرة حزينة

انا كنت

من قبلك

سعيدة

وليل الحزن 

هاجر بعيد

بي نظرتك

شفت الشفاء

وكيفن يطل

في ايامي

عيد

خليتني انزف 

في هواك

ابكي من الالام

قصيد

وهي بالطبع حالة وجدانية خاصة ببعض الالام الناتجة من العواطف وتضاريس الوجد والحرمان

ثم تقول في ابيات جميلة..في قصيدة اخري..

بس بتقدر..

لو بتقدر يلا انسي

كل كلمة ريد وهمسة

انسي ريد عشناه سوا

ياما اصبح بيك وامسي

وبلا شك كتبت الشاعرة سهام يوسف عدد كبير من القصائد الغنائية وترتبط بعلاقات واسعة مع الشعراء الكبار والشباب في اتحاد شعراء الاغنية السودانية وتعمل علي جمع كل قصائدها في ديوان شعري ليري النور وليوثق لتجربتها الشعرية التي حتما تشكل اضافة جديدة للاصوات النسائية الشعرية في الساحة الفنية التي تحتاج لمثل هذه الاصوات لاثراء ساحات الفنون ببلادنا.