عمي الكبير ادوه كف هداك ابوي فوق راسو بوت.. شاعرة سودانية تبدع في وصف مأساة الجزيرة

بعد ان ضجت وسائل التواصل الاجتماعي في السودان بأخبار المجازر البشعة التي ارتكبتها قوات الدعم السريع المتمردة في السودان ضد المواطنين العزل في قُرى ولاية الجزيرة.. كتب الشاعرة السودانية ” أميرة الشعراني” قصيدة تحاول وصف مسأة الاهالي في تلك القرى وقالت :

مرقت غِنيماتا الصباح
ختت عجينا علي التكل واتوشحت توبا الزراق
مرقت علي درب المراح
سمعت عويل سمعت صراخ
ها بت خبارك جارية وين
والناس خبارا مع الصباح
الجنجويد يايمة جو
دخلو البيوت سرقو المقوت ساقو العرايس والبنوت
عمي الكبير ادوه كف هداك ابوي فوق راسو بوت
واولاد ك العاملين شفوت يايمة ماتو الليلة موت
والحلة مرقت والصغار
والزحمة والحر والغبار
والضلمة في عز النهار
والجنجويد فتحوها نار
الدم نزف والخوف رجف والجوف كرف ريحة البواريد والصلف
نزح الجميع
دقشو الخلا ودقشو الوهاد
سابو البيوت بي سترتا
سابو القريشات والدهب الكان قبيل خاتنو لي يوم السواد
واتوشح الكون بالسواد
يا الله ويييين درب الخلاص
ناسا شرق ناسا غرب ناس قبله
ناس ماشين صباح
واتوهطو الدايمه وبكو
غيرالله لي مين يشتكو
كايسين ضليل شان ينتكو
وحبة لبن شان العيال بس يسكتو
صاحت فطينة ابوي وراء فترن كريعاتو ورقد في ضل شديرات الخلاء
ورجعت تخيط في الدرب
يايابا وين انا بي هنا
هجموها اتنين ذي اسود
قالولا ابوك قاعد هنا
وشقو الطريحة الغططا
ادمو الوجيه ادمو الخدود
ورموها في حضن العجوز كان جثة هامدة
وفي ركود
هزت صراخاتا السماء شقت عنان كل السكوت
الا القلوب الداستا لارحمة فيها ولاقنوت
يا الله لطفك ورحمتك
باسمك وعزك وقدرتك
انقذنا من فك الاسود
وارسل علينا مدد جنود
الاحتمال والصبر فات حد الحدود
ياذا الجلال حررنا من ذل القيود

azzapress.com