قصة سوداني يبحث عن سوط عنج في غبيرا بالسعودية لأغرب سبب
وأنا واقف في واحد من محلات بيع المنتجات السودانية في حي غبيرا بالعاصمة السعودية الرياض، عايز اشتري لي بعض الحاجات، جا داخل صاحبي يتلفت ويتفرج في المحل ما خلّى ركن ما عاين فيهو، وفي النهاية جا سأل صاحب المحل: عندكم سوط عنج؟ قال ليهو لا خلص وتاني ما جاتنا بضاعة جديدة، لكن امشي قدام شوية بتلقى.
لحدي اللحظة دي صاحبي ما شافني أو شافني وماعرفني لأنو الغيبة طولت، وهو طالع كده جريتو ليك من كتفو وقلت ليهو سوط عايز تعمل بيهو شنو يا حبيبنا؟ وهاك يا سلام وأشواق وأخبار السودان والأهل، المهم قالي أرح فتش معاي.
دخلنا محل تاني نسأل عن سوط العنج، وصاحب المحل قاليهو كدي شوف ديل، عاين ليهم قال لا ديل صغار شديد وجلد ملفوف ما سوط عنج أصلي، وسألت صاحبي إنت السوط ده عندكم طهور؟ وأبى يرد علي.
مشينا محل تاني قالينا عندنا سوط عنج لكن إيجار بس مافي بيع، صاحبي قاليهو لا أنا عايز واحد وماش بيهو برة الرياض ما بنفع إيجار. وبرضو صاحبي اقوليهو السوط ده عايز تجلد بيهو أولادك ولا شنو؟ يقولي أصبر خلينا نلقاهو أول شي.
ويواصل صاحب القصة حكايته لمحرر النيلين قائلاً بعداك تاني وصفو لينا كم محل جمب بعض قالوا بتلقو فيهم دي أصلا محلات بيع التراث السوداني. ووصلنا محل سألنا فيهو ولقينا عندو بضاعة جديدة لكن سعرو غالي شديد السوط الواحد قال بـ 800 ريال سعودي تخيّلوا! ليه يا زول؟ قال دا ياهو سعرو وبعدين أصلي، صاحبي قال لا نمشي قدام، ورديت ليهو إنت السوط دا عايز تجلد بيهو منو ياخي ما ممكن. قالي الصبر بس.
أخدنا لفة في كم محل لمن رجليني خلااااص، في النهاية استقرينا على محل واشترى منو سوط العنج، ولو شفتو الابتسامة تقولو الراجل ده فرحان خلاص السودان حرروه من الدعامة، قلت ليهو أهو يلا السوط دا لشنو؟
قالي شوف يا حبيب، سوط العنج ده عندنا عرس في الأهل، والعريس ده حالف إلا يعمل “البطان” ويجلد في عرسو، قلت ليهو لكن دي ما بلد بطان ولا ده وقتو ولا ظروفو، قالي شوف العريس ده عروسو كانت مقفولة في السودان طول فترة الحرب، ووصلت هنا بصعوبة جدااا، والراجل ده مر بظروف ما يعلم بيها إلا ربنا عشان يتم المناسبة دي، وهو عايز يعبر عن فرحتو وكلفني بالمهمة دي والحمدلله لقيت ليهو سوط العنج!!
رصد وتحرير – “النيلين”
alnilin.com